足球 Football

Hi，各位波友！當你地睇到呢篇網誌o既時候，我已經離開o左…soccerwave喇，之前網上有傳言話係由於佢地編輯犬夜叉自薦加盟被拒而遭報復cut夏體硬專欄，純粹係傳言！因為犬編根本唔識踢波，射波佢就可能識，我地雙方係和平分手o既。 o黎到新地頭，夏體硬專欄亦會搞搞新意思，由以往得我一條友出聲，變成我同副足主兩個唱雙簧，一人寫一個禮拜，未來亦唔排除會邀請其他隊友，好似可樂暉呢d要chok出o黎o既經典球星上o黎講下波經，甚至請5+him上o黎講下佢對於長居後備有乜o野見解等等。 咁點解要有d咁o既諗頭呢？有睇開呢個專欄o既波友都應該明架喇，早兩年我經常o係呢個專欄寫光頭寫可樂暉寫其他隊友點點點點點，爆佢地d私生活同怪癖出o黎，咁，咪比人嘈囉，又話我獨裁到CY咁款，又話我大搞白色恐怖，所以咪有人借住soccerwave cut夏體硬專欄呢單o野大做文章囉，至於係邊個？唉，大家心照啦，講出o黎光頭又唔開心。 作為體育記者行家，我個人就非常欣賞「體路」呢個網站，畢竟而家主流傳媒大多數篇幅同時間都係用o黎報道歐洲波或者外國體育消息，至於本地運動員呢？除非係有好爆、好突出o既消息，否則都會因為唔夠「紙數」或者「airtime」，而放棄報道，其實咁，對於本地有心有力o既運動員，唔係一件值得開心o既事，多一個好似「體路」咁o既媒體，去cover一d主流媒體忽略o既資訊，對運動員同運動迷都係一件好事，希望大家多多支持「體路」，亦多多click入o黎睇夏體硬專欄！ 唉，下期輪到副足主執筆，唔知佢又會講我咩壞話，諗起就頭痕…… 國足主