【體路專欄】曾經聽人講過，如果一個人連續21天，每天做同一樣的事情，在第22天這件事就會變成習慣。同樣道理，若連續21天都不做習慣性的事情，雖然頭1、2天會覺得不習慣，感覺怪怪的，但到了第22天心情和身體都會adapt，上班如是，拍拖如是，運動也如是。最難的，通常都是第一天。
要想做鐵人，第一件事，就是要好早起身，是5、6點托塔咁早個隻。又要返工，又要做鐵人，something has got to give。 Well…sleep has got to give. Banking最大煲的就是，no one gives a shxt what time it is。若你的美國、英國，甚至通頂的香港同事或客戶有事找你，他們會毫不猶豫，毫無憐憫地拿起電話打你手機。當然，有分大細，MD（Managing Director, 最巴士閉那一個）幾時都打得俾人，Director 都係（但MD 就唔打得），VP/ASO用自己judgment（judgment 錯了就死的很慘），analyst，唔使講都知，唯有熄電話，唔好俾人打到給你。
通常打來第一句，”Sorry, did I catch you at a bad time？”，當你在盤算應否說“Yes, it is a very bad time”之際，通常電話對面的契弟已經連珠炮發射 “Well, I wanted to speak to you on……”。所以，要運動，就要揀無乜人清醒的時候做。美國剛下班，英國仲瞓緊，香港又未起身，托塔咁早，awesome！
第一天的凌晨時分，還正在跟周公傾到興起之際，無情的鬧鐘像發了癲的狂叫。做鐵人第一個考驗到了，你全身的肌肉很狡猾地在不經大腦的情况下，引領你的手關掉了鬧鐘，心裡永遠是“多五分鐘，多五分鐘，多五分鐘”。但再一次醒來時，已經是10.30 am，不但沒有訓練，仲遲到返工，失敗－－明天請早。
已有失敗經驗的我在臨瞓前對自己說，“Remember why you set the alarm clock tomorrow morning”。如是者，第二天跟周公左右互搏之際，鬧鐘響了，突然間自己和自己開始對話，談判。
“起來吧，該訓練了。”
“有啲攰，瞓多陣先啦！”
“唔好啦，你一定瞓過籠！”
“五分鐘，五分鐘….”
經過一輪掙扎，幾經辛苦終於坐左起身，兩眼惺忪的我，在一邊看到的是暖呼呼的床鋪，而另一邊是黑媽媽和凍冰冰的外面，又是一個考驗。最後，決定不理一切，著衫，出門口先算。
開始第一次跑步，最初的5分鐘，覺得自己有啲傻，竟然大清早唔瞓走去跑步，攞苦嚟辛。但很快當身體和意志都適應後，原來在了無人煙的早上做運動係咁爽嘅！仿佛世界只有你一個人，你會覺得你好特别，可能仲有少少興奮添，因為這是你的第一場勝利。
你可能會話，在早上起身有麼了不起呢？一次半次絕對冇乜特別。但若是長期做，仲要無錢收，就一點都不簡單。
鐵人是我的目標，搞笑點來說早晨起來是我的第一步。 但其實目標通常都比較遙遠，而且不易達到，（說真的，若目標是能容易地達到，那就不是一個目標了）想要達到目標就必須踏出第一步，不管這一步是多麼的渺小，你已經走近了一步了。
馬拉松賽，全鐵人賽甚至人生不都是這樣一步一步地走出來的嗎？
細心想想自己是否有事情想做但仍在talking mode ？Well, stop talking and start doing，勇敢地踏你的第一步吧！