如果你同筆者一樣睇波睇咗至少10年以上,你最近可能同我一樣齊齊面臨「NBA中年危機」。

20130907-allen_iverson

圖片來源:exnba.com

究竟咩嘢係「NBA中年危機」?就係當初陪你長大嘅NBA球星,一個又一個退休,你會覺得非常無奈但無法阻止,曾經喺NBA隻手遮天或佔一席位嘅球星,都敵不過歲月神偷,體力已經不及20歲出頭嘅後起之秀,唯有宣佈退休。呢種感受,就好似你由一個型英帥靚正兼溝死女嘅學生哥,變為一個賤肉橫生嘅中青/中年阿叔,一樣咁坎坷。

作為一個對籃球熱情仍然未改嘅中青/中年阿叔,去到球場同一班著到五顏六色、插花多過傳波嘅後生仔同場競技,你即使幾唔順超都好,你會發覺你已經跟唔上佢嘅腳步,自此出現喺骨場嘅次數多過喺球場。(唔好心邪,我講正經個D!)

今年暑假一開始,Grant Hill、Jason Kidd、T Mac同Allen Iverson(下稱AI)宣佈退休,傷盡唔少球迷心,但兩位40歲阿叔宣佈退休嘅震撼性,結終唔夠T Mac同Allen Iverson兩位後輩大。

有唔少球評或球迷會用「悲劇英雄」去形容T Mac同AI,因為佢地從來未拎過冠軍指環,當中T Mac從未試過以主力身份帶隊闖過季後賽首圈。但係唔係一定要有冠軍先至叫做偉大?倒返轉問,係唔係未考過第一就叫做「悲劇學生」?未拎過最佳員工就叫做「悲劇員工」?

AI對籃球迷嘅影響實在太多太多,佢帶起嘅Hip Hop文化影響無數籃球員同大眾球迷,令到紋身、辮子頭、HeadBand、手袖套、絲襪褲,都成為籃球上不可或缺嘅元素。明明唔係好凍,但你會喺修頓球場見到有人著住絲襪褲打波;明明隻手無傷,你又會見到有人戴上手袖套,原來AI嘅Hip Hop精神,已經不知不覺成為我地籃球生活嘅一部份。

以往6呎7至8吋嘅高瘦球員一直被人忽視,原因係打4號位又唔夠人高同大隻,打2號位又會擔心佢速度唔夠,但T Mac以多元化球風為自己奠下明星地位,同時為高瘦球員創出一條新道路!

筆者相信,唔會有下一個AI、唔會有下一個T Mac,但兩位過去十幾年喺NBA球場上奮戰嘅畫面,永遠留喺我地心目中。

image_pdfimage_print

Comments