20170329-15nagoyamarathon

【讀者投稿】上年3月12號我地4個女生 Christine,Edo,Gigi,Mandy因「揹水一戰」而相識,因為大家都喜愛跑步而成立咗 - Runder Woman,希望分享跑步資料同經歴,令更多人感受到跑步既樂趣。一年後我地嚟到名古屋參加全球最大型既女子馬拉松,仲要係第一次齊人旅跑,令到呢個名馬真係別具意義。

20170329-08nagoyamarathon 20170329-06nagoyamarathon

4個唔同跑步年資既女生,各自抱住唔同心情同目標去迎接名馬:

20170329-10nagoyamarathonChristine:初馬係2016年柏林順利跑完,回想依然都會眼濕濕,因為自己完成到,因為堅持無放棄,因為贏左自己,呢種為自己感到驕傲既感覺想一直延續落去。而名馬係我第二個馬拉松,有左第一次經驗,自己都有set目標一定要PB。

20170329-12nagoyamarathon

Edo:每次同人提起將要跑名馬,好多人都回我一句:「你都跑過全馬啦,有咩好驚……」但我好清楚每一隻馬都唔同,每一次都要做好身心準備,而今次目標:要盡力要令自己無悔﹗希望可以係4小時15至30分完成(初馬跑咗將近6小時……)20170329-11nagoyamarathonGigi:全馬對我黎講係估唔到既辛苦, 42.195根本就唔係二個半馬咁簡單,我睇得太輕了…

20170329-02nagoyamarathon

Mandy:回想起第一次跑步,3公里就要停,全馬對我嚟講更加係一件好遙遠嘅事,發夢都估唔到2年後可以圓左呢個遙不可及嘅夢。因為一直以嚟跑步成績一般,加上傷患困擾,所以對初馬唔敢定好高目標,只希望5小時20分內完成。

透過大小賽事保持訓練,同時增加賽事經驗:

作為出咗黎社會做野既人,我地4個都同大家一樣好忙,要返工要返學要顧家人,但我地唔想俾藉口自己懶,更何況時間係抽出黎。賽前半年內我地keep住參加唔同距離賽事,Asics Run 10K, Pocari Sweat Run 10K, Geo Hero Run 21K, AXA街馬32K, 渣馬21K等,希望透過準備賽事,保持訓練,同時增加賽事經驗。

另外,知道自己有咩需要加強既地方,就重點訓練,希望係有限時間內盡量進步。Gigi同Mandy有參加跑會練衝圈,加強心肺功能同體能,Mandy既教練仲為佢既目標時間制定適合既練習表;Christine係返工返學考試之下,都盡量係返工前/放假既時間練習長距離均速;Edo就主力練長課耐力,2月份累積200K。其實過程真係唔輕鬆,但我地明白賽前唔辛苦,比賽更辛苦!

20170329-09nagoyamarathon

時間總係短暫,準備總係不足,話咁快我地4個已經係J區上線區,冇得諗咁多,只有保持信念堅持到底﹗

Christine:「 咁遠飛到黎,落得場跑,就唔好擔心,盡情去享受,去發揮自己力量,跑到最好!」比賽開頭35公里既路程大至上都無問題,保持到均速,但當去到38公里對腳開始唔係好聽話,心諗 : 不如行1公里放鬆下再跑, 但望下隻錶同自己當時既狀態,好怕行左之後會跑唔返,而且頭35公里都保持得好好,唔可以放棄!再諗到其他3位隊友都努力緊,更加要堅持落去!

Edo:「辛苦咁耐,終於到咗今日啦!」見到途人加打氣想喊,發現2個半鐘完成25公里又想喊,諗起練長課時既辛苦又想喊,開心既係比起初馬25公里後已經冇力跑,今次明顯進步咗,跑到30公里身體同心理狀態都仲好好,可惜到33公里打對腳開始冇力又抽筋,同自己講 「點都唔可以停!」突然腦海中出現對面線剛剛經過既頭幾位領先選手,佢地堅定向前跑既步伐,俾左好大動力我,提醒自己挺直身提腿擺手咬緊牙關堅持到最後!

Gigi:頭半馬雖然都有痛腳,都保持平時速度,但去到25公里出現撞牆,二隻腳唔止痛到提唔起,仲感覺到個心同身體不停抗議,冇練過30公里既距離真係好可怕,係完全控制唔到,冇想像過既事。最後10公里係前所未有咁漫長,成個人好似分開左幾個部分咁,但幾辛苦提唔到腳都好,都要堅持慢跑加快步,一定要完賽!當見到40公里牌既時候,係我最享受既時刻,我好感動亦好感恩,多謝沿路有打氣既每一位及一齊跑既每一位女子。

Mandy:腳傷上場嘅關係,開跑唔敢快,去到16公里追到sub 5嘅pacer,一直保持6分20秒配速到30公里。到32公里後,每走一公里都變得好漫長,右腳嚴重抽筋,好彩旁邊救護人員見到,同我一齊去救護站,心情好擔心,不斷望後面sub 5 pacer有無追上嚟,腳筋一直抽住,慢慢行返鬆一鬆一公里到,就繼續跑返,跑到35公里既大斜路,雖然每一步都好細步,堅持唔容許自己pacing跌出7分外,一定要保住sub 5。

20170329-03nagoyamarathon

衝線一刻眼淚湧哂出嚟,盡情咁為自己而感到驕傲:

Christine:最後去到終點,眼淚即刻湧哂出嚟,我得左啦,PB啦!嗰刻真係好感動,之後逐一見到隊友跑到終點,好開心我地四個都順利完成!

Edo:衝線一刻見到時間4:30:45,總算對自己有個交待,我終於可以喊出黎喇!拎完賽紀念品、拎返行李,感覺仲好似發左場夢咁,呢42公里係點樣跑返黎架。

Gigi:我知自己成績唔夠好, 但我成功挑戰咗一個真正跑手想擁有既42.195。令我堅持完成既一句說話:「只要心沒有放棄身體便會跟隨」 陳彥博。

Mandy:穿過會場外停車場再踏上會場地毯,見到”FINISH”個牌,喊住衝返終點,初馬終於順利完走,心情從未咁激動過,從未咁為自己感到驕傲。

20170329-05nagoyamarathon

致女生們: 女生力量無限大,千萬唔好睇小自己:
今次係我地第一次參加名馬,一個全女子既馬拉松,2萬8千名喜愛跑步既女生,有年輕有年長,亦有傷殘人士,大家既能力雖有差異,但我地見到既係永不放棄既精神,無論成績如何,呢份堅持到底既信念,證明咗女生力量可以無限大,千萬唔好睇小自己呀﹗

作者:Runder Woman
Facebook page:Runder Woman

Instagram:runder.woman

image_pdfimage_print

Comments